ရုတ်တရက်အလုပ်လက်မဲ့ ဖြစ်သွားတဲ့အခါ ဘာလုပ်သင့်လဲ

ဒီအခြေအနေဆိုတာ လူတိုင်းကြုံရတတ်တဲ့ အခြေအနေပါပဲ။ ဒီလိုအခြေအနေမျိုးမှာ အကောင်းဘက်ကတွေးပြီး အကျိုးရှိရှိကျော်ဖြတ်လိုက်ရအောင်ပါ။

(၁) သက်တောင့်သက်သာ အနားယူပါ

စိတ်က အနားမယူဘဲ တွေးတောလှုပ်ရှားနေရမယ့် အချိန်ဆိုပေမဲ့ ကိုယ်ခန္ဓာကတော့ အနားပေးလိုက်ပါ။ အကောင်းဘက်ကတွေးရင် မနက်စောစောထဖို့ မလိုဘူးလေ။ အဲဒီတော့ စိတ်ဓာတ်ကျစရာတွေ တွေးနေမယ့်အစား အိပ်ရေးဝဝအိပ်၊ ရုပ်ရှင်လေးကြည့်၊ စာအုပ်လေးဖတ်နေပါ။ ဒါမှ နောက်အလုပ်တစ်ခုထပ်ရှာဖို့ အင်အားတွေရှိမှာ။

(၂) ကိုယ့်အခြေအနေကို အမှန်အတိုင်းသိပါ

စိတ်ညစ်လို့ဆိုပြီး သူငယ်ချင်းတွေနဲ့ အပြင်ထွက်၊ လက်ထဲကျန်သမျှငွေ သုံးစွဲပစ်တာမျိုးမှာတော့ ကိုယ့်ကိုယ်ကိုယ် အလိုမလိုက်မိပါစေနဲ့။ ဒီအချိန်က စေ့စေ့စပ်စပ်သုံးနိုင်မှ တော်ကာကျမယ့် အခြေအနေပါ။ ဒါမှ နောက်အလုပ်မရခင်အထိ လက်ထဲမှာ သုံးစရာ ရှိနေမှာပေါ့။ ဒါကြောင့် ဒီအခြေအနေအတွင်းမှာ မလိုအပ်တာ မသုံးဘဲ ကိုယ်လိုအပ်တာပဲ သုံးဖို့လေ့ကျင့်ပါ။ ငါတော့ မွဲနေပါပြီဆိုပြီး ဒရာမာတွေချိုး၊ စိတ်အားတွေ ငယ်မနေပါနဲ့ဦး။ ဒီအခြေအနေက ခဏတာပါပဲ။

(၃) အလုပ်မရှိဘူးဆိုတဲ့အကြောင်းကို အားလုံးကို ပြောဖို့ဝန်မလေးပါနဲ့

အများစုက ဒီအခြေအနေကို အများပေးသိရတာ ရှက်စရာကောင်းတယ်လို့ တွေးကြပါတယ်။ တကယ်တော့မဟုတ်ပါဘူး။ ပြောခဲ့သလို တစ်ယောက်မဟုတ် တစ်ယောက် ကြုံနိုင်တဲ့အချိန်ပဲလေ။ အဲဒီတော့ ကိုယ့်အသိမိတ်ဆွေတွေကို လောလောဆယ် ကိုယ်အလုပ်ထွက်ထားကြောင်း ပေးသိပါ။ (အိတ်သွန်ဖာမှောက် ဖြစ်သမျှပြောရမယ်လို့တော့ မဆိုလိုပါဘူး၊ လောလောဆယ်အလုပ်ထွက်ထားတယ် ဆိုတာလောက်ပဲပေါ့) ကိုယ့်အသိတွေကနေ တစ်ဆင့် အလုပ်တစ်ခု အချိတ်အဆက်ရချင်လည်း ရနိုင်တယ်လေ။ ဒါကြောင့် ကိုယ့်အတွက်အလုပ်ရှာပေးနိုင်တယ် ထင်တဲ့သူမျိုးဆို သူမမေးလည်း ကိုယ့်ဘာသာသွားပြောထားလိုက်ပါတော့..

(၄) တစ်ခုခုကို လေ့လာသင်ယူပါ

လက်ရှိအချိန်မှာ အားနေတာဆိုတော့ ဟိုတွေးဒီတွေးနဲ့ ထိုင်နေမယ့်အစား တစ်ခုခုကို လေ့လာသင်ယူနေတာ ကောင်းပါတယ်။ သင်တန်းကြေးအကုန်မခံချင်ဘူးဆိုလည်း မပူပါနဲ့။ ပညာဒါန သင်တန်းတွေအများကြီး ရှိပါတယ်။ အင်္ဂလိပ်စာပဲဖြစ်ဖြစ်၊ တခြားဘာသာရပ်ပဲဖြစ်ဖြစ် ကိုယ့်အတွက် အကျိုးရှိစေမယ့် သင်တန်းတစ်ခုခုတက်ရင်း နောက်အလုပ်တစ်ခုရမယ့်အချိန်ကို စောင့်ဆိုင်းလိုက်တာကောင်းပါတယ်။

အရာရာက ဆိုးသလား၊ ကောင်းသလားဆိုတာ ရှုမြင်တဲ့ပုံစံကို လိုက်ပြီးကွာခြားပါတယ်။ ရုတ်တရက် အလုပ်လက်မဲ့ဖြစ်သွားတာက စိတ်ဓာတ်ကျစရာကောင်းတယ်ဆိုပေမဲ့ အခု အက်ဒ်မင်ပြောပြသလိုသာ လုပ်မယ်ဆိုရင်တော့ အဆိုးထဲက အကောင်းအနေနဲ့ ကိုယ့်အတွက် တန်ဖိုးရှိစေမယ့် အရာတွေကို ရရှိပိုင်ဆိုင်နိုင်စေမှာပါ။

Credit;Sugar Cane (For Her Myanmar)