James Bond နှင့် နာမည်ကြီး ဖက်ရှင် Brand များ

ဂျိမ်းစ်ဘွန်းဟန်နဲ့ ဖက်ရှင်တွေဟာ လူငယ်မျိုးဆက်တွေပေါ် ဩဇာလွှမ်းမိုးခဲ့ပါတယ်။ ဂျိမ်းဘွန်းဇာတ်ကောင်တွေ ဝတ်ခဲ့တဲ့ အဝတ်အစား နဲ့ ဖက်ရှင် Brand တွေအကြောင်းဟာလည်း ဂျိမ်းစ်ဘွန်းလိုပဲ စိတ်ဝင်စားဖို့ ကောင်းပါတယ်။

(၁) Sunspel

ဗြိတိန်တန်ဖိုးကြီး ရှပ်အင်္ကျီအမှတ်တံဆိပ်တစ်ခု ဖြစ်ပြီး ၂၀၀၆ မှာ ထွက်ခဲ့တဲ့ Casino Royale မှာ ဒန်နီယယ်ခရေ့ချ် ဝတ်ခဲ့တဲ့ ပိုလိုရှပ်ကို Sunspel က ချုပ်ပေးတာ ဖြစ်ပါတယ်။ ဒီ brand ဟာ ၁၈၆၀ လွန်ခဲ့တဲ့ နှစ်ပေါင်း ၁၆၀ ကတည်းက စပြီး တည်ထောင်ခဲ့တာ ဖြစ်ပြီး Sunspel က ထုတ်တဲ့ Boxer ဘောင်းဘီတို ၊ တီရှပ်နဲ့ ပိုလိုရှပ်တို့က နာမည်ကြီးပါတယ်။

(၂) Tom Ford

အမေရိကန်ဖက်ရှင်ဒီဇိုင်နာ သောမတ်စ်ကာလိုင်းဖို့ဒ် ရဲ့ Tom Ford ဖက်ရှင်တွေကို နာမည်ကြီးဟောလီးဝုဒ်ရုပ်ရှင်မင်းသား/မင်းသမီးတွေ ဖြစ်တဲ့ ဘီရွန်းဆေး ၊ ဂျနီဖာလိုပက်ဇ် ၊ ဂွင်းမ်ပယ်ထရို ၊ ဒန်နီယယ်ခရေ့ချ် ၊ တွမ်ဟန့်ခ် ၊ ဂျွန်နီဒက်ပ် နဲ့ ဝီလ်စမစ်တို့လို ပုဂ္ဂိုလ်တို့ နှစ်နှစ်သက်သက် ဝတ်ကြပါတယ်။ Quantum of Solace ၊ Skyfall နဲ့ Spectre ရုပ်ရှင်တွေအတွက် ဒန်နီယယ်ခရေ့ချ်ဝတ်ဖို့ Suits တွေကို Ford က ဒီဇိုင်းထုတ်ပေးခဲ့တာ ဖြစ်ပါတယ်။

(၃) Crockett & Jones

အင်္ဂလန်ဖြစ် နာမည်ကြီး ရှုးစ်ကုမ္ပဏီတစ်ခု ဖြစ်တဲ့ Crockett & Jones ကို ၁၈၇၉ ခုနှစ်မှာ တည်ထောင်ခဲ့တာပါ။ Crockett & Jones ဟာ ဂျိမ်းစ်ဘွန်းရုပ်ရှင်ထုတ်လုပ်ရေးဖြစ်တဲ့ EON Productios နဲ့ တရားဝင် ပါတနာဖက်ရှင်ကုမ္ပဏီ ဖြစ်ပြီး ထွက်ထားတဲ့ Skyfall ၊ Spectre ကားတွေမှာအပြင် အသစ်ထွက်လာမယ့် No Time To Die မှာပါ Crockett & Jones ဖက်ရှင်တွေ ပါဝင်လာမှာပါ။

(၄) Omega

Omega ဆိုရင် နာရီချစ်သူတွေ မသိမရှိလို့တောင် ပြောနိုင်ပါလိမ့်မယ်။ ဆွစ်ဇာလန်နာရီကုမ္ပဏီ Omega ဟာ ၁၈၄၈ ကတည်းက စတင် တည်ထာင်လာခဲ့တဲ့ အမှတ်တံဆိပ်တစ်ခု ဖြစ်ပါတယ်။ ၁၉၆၉ ခုနှစ်က လပေါ် ပထမဆုံးရောက်ခဲ့တဲ့ နာရီကို Omega က ထုတ်ခဲ့တာပါ။ ဂျိမ်းစ်ဘွန်းတွေဟာ ၁၉၉၅ ကတည်းက Omega နာရီကို ဝတ်ခဲ့ပါတယ်။

(၅) Persol

ဂျိမ်းစ်ဘွန်းရဲ့ လက်စွဲ Accessories တွေထဲမှာ Persol မျက်မှန်တွေလည်း ပါဝင်ပါတယ်။ အီတလီနိုင်ငံ တူရင်မြို့မှာ ၁၉၁၇ ခုနှစ်က Persol အမှတ်တံဆိပ်ကို တည်ထောင်ခဲ့တာ ဖြစ်ပါတယ်။ Persol မျက်မှန်တွေကို GoldenEye ၊ Die Another Day နဲ့ Casino Royale တို့လို ဂျိမ်းစ်ဘွန်းရုပ်ရှင်တွေမှာ သုံးခဲ့ပါတယ်။

Kwee